Passader Füerwehr steiht ok 2018 goot dor

Ehrenamt ut Öbertügen – Ne’e Anwärter op Johrshauptversammeln

(jg) An’n föfften Oktober tweedusendsöbenteihn stünnen Grundstück un Keller vun ehr Familie ünner Water, un allens weer rein to’n Vertwiefeln. Man denn kööm de Freewillige Füerwehr Passaad mit Ünnerstütten vun de Kameraden ut Fohren. Se hebbt pumpt, un dor weer in’n besten Wortsinn wedder Land in Sicht. Op de Johrshauptversammeln vun de Freewillige Füerwehr Passaad an’n drütten Februar hett de tweeuntwintig Johr ole Julia Greve düssen Obenblick as „Slötelbeleevnis“ beschreven. Sietdem weer ehr kloor – se will mit bi ween. De Kameraden hebbt de junge Fro gern as Anwärter opnahmen.

„De ne’en Kameraden: Jannes Ahrendt und Julia Greve“ (Abdruck frei)

Düsse Insatz in’n Tegelredder is een Punkt op en lange List. Tweedusendsöbenteihn harrn de Passader dörteihn Insätz. „Mehr as sünst“, sä Wehrföhrer Andreas Schülke bi dat Drepen in de “Fischerwiege”. Dorto höör en Fehlalarm in’n Hagener DRK-Kinnergorrn in’n März, de Brand in’n Gödersdörper Weg in’n Mai, veer havareerte Mannslüüd op’n Passader See in’n August jüstso as en Boom op de Straat in’n September.

Ok de Ümstand, dat se dree Johr vörher bi’n Amtsfüerwehrdag siegt harrn, geev de Passader Brandschützer düchtig to doon. Tosamen mit Stakendörp schullen se den Amtsfüerwehrdag in’n Juni tweedusendsöbenteihn utrichten. De Party merrn in’t Dörp weer en groten Erfolg: Tiet, Ort, Wedder un Gäst weern richdig, sogor en lütten Öberschuss kunn de Wehr trüüchleggen, stell op de Versammeln en tofreden Thomas Pieper in sien Bericht as Kassenwart fast.

De Freewillige Füerwehr Passaad is goot opstellt. Tweeundörtig Aktive maakt Deenst, ünnerstütt vun dreeunsöbentig Förderliddmaten. In’n Snitt sünd de Aktiven veertig Johr oolt. Dat is twee Johr jünger as anner Johr. Dat junge Lüüd narückt, dorför sorgt se in de Jugendfüerwehr Passader See, de Passaad tosamen mit Fohren un Stoltenbarg hett. Negenteihn Jungs un Deerns maakt hier mit, dorvun negen ut Passaad. To de wichtigen Tieden bi den Nawuss hören sachts dat August-Teltlager in Hameln oder de Besöök vun’n Hansapark in’n September. Mit Antonia Rasberger hett de Jugendfüerwehr sogor en  Kreisjugendgruppenleitersch in ehr Regen. Poor Daag na de Johrshauptversammeln is se nochmal för een Johr in düt Amt wedderwählt worrn. Bi düssen Kreisjugendfüerwehrdag hett ok de stellvertreden Wehrföhrer vun Passaad Karsten Wachtel för siene Verdeenste üm dat Schleswig-Holsteensche Jugendfüerwehrwesen de Leistungsspange in Bronze kregen.

To de Opgaven vun den Vörstand höör op de Johrshauptversammeln ok dat Ehren un Befördern vun verdeente Kameraden. Ehrenwehrföhrer Uwe Stoffers un Löschknecht Gerhard Göttsch hebbt se utteekt för föfftig Johr Liddmaatschop bi de Füerwehr, Hauke Klindt för dörtig, Hannes Hesse för fiefuntwintig Johr. Helge Groß hebbt se befördert to’n Löschmeister, Thorsten Krause un Jan Graf sünd nu Oberfüerwehrlüüd.

Amenn sä Wehrföhrer Andreas Schülke, dat he glücklich is, dat Leit to hebben bi de Passader Wehr. He möök dütlich, dat Schutz dörch de Füerwehr nich sülbstverständlich is un dat Kinner oder Arbeit keen Argument gegen dat Ehrenamt ween schull. Schülke wünsch sik, dat ok de Gemeen sik aktiver an dat Warven vun ne’e Liddmaten bedeligt. Sünnerlich freit mag he sik dor öber Jannes Ahrendt hebben. Jüstso as Julia Greve is de achtteihn Johr ole Schöler nu Anwärter bi de Passader Wehr. As he sik vörstell, sä he kort un goot: “Ehrenamt leevt vun’t Mitmaken. Hier bün ik.”

„In de Streck: Finn-Ole Greve ünner Atenschutz op’t Loopband“ (Abdruck frei)

De Johrshauptversammeln is ümmer de Anfang vun de ne’e Deenstsaison bi de Passader Brandschützers. Gliek achteran op’n Maandag weern de Atemschutzgeräteträger hen na de Füerwehrtechnische Zentraal in Preetz. Bi’n Fitnesstest un en Krabbelmarsch dörch en düstern Parkour mütt se dor jo eenmal in’t Johr wiesen, dat se noch döggt, wenn’t ernst warrt. Annern Maandag weer denn Deenst in’t Sprüttenhuus, neem se de Füerwehrdeenstvörschrift III dörcharbeit hebbt. Wenn düsse Ortsnarichten rutkaamt, steiht al de nächste Insatz an: Teihnten März is in’t Dörpshuus wedder Passader Theaternacht. Ok dat nich to dinken ahn Ehrenämtler, de mitmaakt. Wokeen Lust hett un dorbi ween will bi de Freewillige Füerwehr Passaad, de kann sik jedertiet bi Wehrföhrer Andreas Schülke mellen.

Julia Greve un Jannes Ahrendt hebbt dat daan un sorgt passlatang dorför, dat tokamen Johr dat Dörchschnittsöller nochmaal sieder ween warrt.